الفوووووووووووووووووووووول
لمين أقول
مهو مش معقول
حد يقولي مين مسئول ؟؟؟
الحال بقي طين
و الناس نايمين
يمكن من أكلان الفول
مين اللي بيمنع عنا الشوف
ايه اللي بيزرع فينا الخوف
قولوا بسرعه أعملوا معروف
يمكن يطلع برضه الفول
دا شعب جميل لهمومه شيال
و عمره ما يشكي مالأحمال
يخرب بيت لأبو طوله البال
مين جابهالنا؟برضه الفول؟!!
و أيه بيخلي الناس محتاره
نفض .. قوم ولعلي سيجاره
دا حتى ولو غرقوا عباره
هتلقي الكابتن واكل فول
و أيه يا خوالنا في القطورات
مالها بتعشق ليه الصدمات
قالوا هيعملوا مطبات
و يمنعوا خالص أكل الفول
وآه منك يا أبو زيت و رغيف
وآه مالناس و من التخاريف
يا خساره يا بو دم خفيف
غمسوا همك جوا الفول
القاهره
10/8/2007
Labels: poems