يومها

الخروجه فاكاست و الناس زهقت و بدأوا يتسرسبوا علي الباب واحد ورا التاني .... وهي ولا علي بالها أي حاجه .... اللي يشوفها يقول قرفانه من الناس اللي معاها - اللي هم أحنا- و مش طيقاهم و نفسها تروح حالا .... بس الحقيقه أنها هي اللي لمتنا مع بعض في اليوم ده ...و طلبت نروح المكان ده بالذات .... مكنتش أعرف ليه ساعتها لكني عرفت بعدين .... كانت بتيجي هنا كتير زمان مع صاحبها .... كانت دايما تقولي عليه أنه خسر كتير قوي يوم ما سابها
و أنا الصراحه كنت بنفضلها .... أو ساعات بقولها كلمتين من بتوع (معلش) و(بكره يرجع) و هكذا .... لكن يومها كانت عايشه في ملكوت تاني ....صحيح أنها كانت بتتكلم معانا و بتضحك و بتاكل و توشوش صاحبتها ذي أي بنت ..... بس كنت بلمحها سرحانه علي طربيزه معينه و الغريب أن الطربيزه دي فاضيه .... مفيش حد عليها
و أحنا خارجين كنت طالع معاها أتأخرت عني خطوه و وقفت تبص تاني علي الطربيزه أياها بس المرادي طولت حبيتين ..... ناديتلها ..... (مالك بتبصي علي أيه؟) بصتلي و رغاوي الدموع في عينيها بتفكر تنزل .... (مفيش حاجه)
ساعته بس عرفت هوا خسر قد أيه