ورطه

من ديوان نضاره شمس
لعطيه حسن

ايه يعني
لو ترمي صراحتك
من شباك الدور التالت
و تنزل بهدوء
و بلاده
و كأنك بتشيع ميت

ايه يعني
لو تكدب حبه
و تجمل نفسك
و تبقي طبيعي .... و ناجح
ذي سياسي شريف
بيعبر عن أحلام الطبقه

مش راح تبني يوتوبيا
و عمرك حتكون عنتر
إنت يا دوب
إسم رباعي
تحت الرقم القومي

طب ليه شايل علي كتفك
قفه مثاليات
و كأنها ورث
عن فارس مقتول
أو جاريه كشفت عجز الحاكم

لازم تفهم لغه العصر
يعني الورد بلاستيك
و الخيانات مقبوله
و الفروسيه تخلف
و المرايات عميانه
و مفيش قدامك
غير تقفز علي ضهر سحابه
و ترحل ورا خيالاتك
يا تسلم نفسك
الي أول متحف