Friday, September 29, 2006

ان فات الياباني ..... هات الصيني

في البدايه أحب أسجل أعجابي بشعب الصين و حضاره الصين الشعبيه ..... شعب الصين اللي بدا حياته مسكين غلبان بيعمل الحاجات التقليد المضروبه و يبيعها للعالم بسعر أرخص من المنتجات الأصليه .... أحب أسجل أعجابي - تاني - بعبقريه الشعب الصيني اللي بدا الحكايه واحده واحده و بالهداوه لحد ما بقي من أكبر تجار السوق .... والله شعب عصامي يستحق تحيه العالم .... يعني بدأ من تحت الصفر و بعدين عمل حاجات مضروبه رخيصه و بعدين ركب عجله التطور و بقي شعب جامد تنييييين ..... طبعا لسا مبقاش ذي الياباني بس أهو بينافس بسعره ....

الصين بيصنعوا في بلدهم كل حاجه ... بدايه من الأبره و الفتله و الهدوم و سجاجيد الصلاه و فوانيس رمضان و تماثيل أبو الهول الصغيره اللي بتتباع عند الهرم و المتحف للسياح و مرورا باكسسوارات السيارات و السيارات و النضارات و الموتسيكلات و أجهزه الكمبيوتر و حتي السجاير المارلوبورو بقي فيه منها صيني بيتباع ب 4 جنيه .....و للعلم للأخوه غير المدخنين أن العلبه الماروبورو الأصلي ماركه فيليب مورس بتتباع ب سبع جنيه و نص .....

في ايه تاني ممكن يتباع للعالم و الصين معملتهوش .......... مأظنش انه فاضل حاجه يضربوها ألا البني ادمين ,,,, يعني يبيعولنا نسوان في شنط .... كيس ظريف لونه بمبي عليه فيونكه جواه واحده.... و أنت حر بقي أعمل اللي أنت عاوزه انشالله تتجوزها ... و ساعتها مش هتقولك أنا عاوزه شبكه و مهر و شقه و دش و فيديو و الكلام ده مهي صيني بقي ... يعني مضروبه و أنت سي السيد الأمر الناهي أبسط يا عم بقي .....

مش عايز أرغي في الأخر بقي علي حالنا أحنا و أتكلم علي مواكبه العصر و شويه الكلام الفاضي بتاع المسئولين عندنا هنا .... بس القارنه فعلا مستحيله .... الصين ركبتنا و دلدلت رجليها و بعدين أنت فاكر أن أحنا بس اللي كده!!!!! لأ ... داحنا كتير قوي ....

Labels:

Saturday, September 23, 2006

يا صحبجيه .... ايه يا للي

التاريخ : صباح يوم الخميس اللي فات

الساعه : اربعه العصر

المكان : حديقه الأزهر .... مسرح الجنينه

الحدث : حفل فرقه الصحبجيه ... و دول غير الصهبجيه

ركنت العربيه أدام المسرح و أخدت دقيقه بتفرج علي المكان و المسرح الخالي اللي هيبقي بعد خمس ساعات بيبظ بني أدمين .... سامع نغمات البروفات من داخل المسرح .... صوت أحمد أنور الحنين (صاحبييييييييييييييييي و هي حبيبته ).... نزلت السلم و وصلت للمسرح و أول ما وصلت كانوا وقفوا اللعب عشان صوت مش عارف أيه في الأفيكتات بتاعت الجيتار مش واضحه ... أنا الصراحه مليش أوي في حوار المزيكا

صباااااااااااااحه يا رجالتنا
و الكثير و الكثير من البوس و الأحضان أكننا مشفناش بعض من أيام حفر البحر .... المهم يعني أعدت مع الشباب ... شديتلي كرسي جنب الشاعر المنافس ( محمد حامد ) اللي أبدع فعلا في كلمات أغانيه بالذات أغنيه (بحر أزرق) و ده رأيي الشخصي يعني ..... المهم أعدنا نناقش أيه ظروف النهارده و اللي هيتم ان شاء الله

سمعنا بروفه في السريع كده علي أغنيه ( قوله لو) و دي كلماتي أنا و تم بدء الحفله بيها و الحمد لله أنهالاقت أعجاب الشباب

أحمد عطوه لاعب البركشن ( الطبله و الدف و الرق) و أحمد أنور ( المطرب) أول مره ينزلوا في حفلات ... و بالتبعيه قرفوني في عيشتي من كتر الأسئله علي غرار ( أنا صوتي طالع و لأ؟؟ ) و( هوا كده كويس) و ( خلي ودنك معايا بقي ) و ( طب دي أحلي ولا دي ) و ( خد الولاعه و سخنلي الدف ) و (روح أطلع فوق السور اللي هناك ذي منا طلعت من شويه و حطلي الدف أدام الكشاف اللي فوق أوي هناك ده ) دا بأعتبار أني شغال في السيرك ..... قابل بقي الصداع يا معلم اللي ركب دماغي و دلدل رجليه

أرتباك أنور قبل بدايه الحفله بنص ساعه مثلا كان زياده قوي .... الصراحه هوا معزور طبعا بس برضه لازم يزبط الموضوع ده عشان كان مأثر عليه في بدايه الحفله .... كان باين في صوته قوي في البدايه .... و ده مش رأيي أنا بس .... دا كان رأي المدونون اللي حضروا أمثال معت و نفتيس و بطابيط

الساعه بقت تمانيه و ربع و لسا محدش جه .... و قفت علي الباب مع باسم علي مكتب التذاكر .... عشان كانوا حاطين مكتب مدغدغ مسنود بطوبه علي حيطه مايله مضروب بمدفع ... و المفروض نقعد عليه و نقطع التداكر للجماهير الغفيره .... سألته سؤال بريء ( قطعت كام تذكره يابو باسم) .... بصلي بصه مش ظريفه خالص و قالي ( حداشر) .... و نزل الخبر كالصاعقه ... أصل دا مش عدد ناس .... لأ .... دي فضيحه

الحمد لله الناس وصلت ... و العدد بقي ظريف و أطمنت شويه و قمت أوزع برنامج الحفله علي الموجودين مع حامد (الشاعر المنافس) لقيت تلات بنات قعدين لوحدهم ... أديتلهم الورقتين و مشيت ,,,, محدش فينا أتكلم .... الموقف أصله مش محتاج كلام ... بصه مدت أيدي بالورق مع أبتسامه بلهاء خدوا الورق و قعدوا يذاكروه .... أخدت بعضي و رحت لغيرهم .... بعد ساعه عرفت أن التلات بنات دول معت و نفتيس و واحده صاحبتهم .... الدنيا دايائا يا جدعان

بدأت الحفله و جعفر وصل و معاه الكامير اللي مقلبها من عبد الرحمن أككك ( ده أسمه ) صورنا الحفله كلها بالتناوب ... بس للأسف الكاميرا فصلت شحن بس بعد ما خلصت كل الأغاني ... و ملحقتش أصور الأغاني اللي أتعادت في الأخر

خلصت الحفله و أنور قدم الباند واحد واحد و قدمني أنا و حامد بأعتبارنا اللي كاتبين الكلام
و شكر الناس و مش عارف ايه و شويه القرع اللي في اخر كل حفله

دخلوا الكواليس و أنا طبعا وراهم ....المشهد بعد كده كلنا حاضين بعض و بنتنطط من الفرح و بوس و أحضان أكتر من اللي في الأول .....و بعدين الشباب أصحابنا توجهوا علي المسرح و بوس تاني و أحضان تانيه و صور كتييييييييييييير بقي كلنا مع بعض ...

الحفله نجحت الحمد لله .... و العدد كان كومبليه و الناس مبسوطه .... بس أنا أحب أشكر محمد أسماعيل الملحن و الموزع و لاعب الجيتار و العود للمجهود الخرافي اللي عمله عشان الحفله دي ... أكيد كلهم تعبوا طبعا ... بالذات أنور و عطوه اللي أول مره ينزلوا في حفله
بس ميشو ( محمد أسماعيل) هوا اللي عامل الباند و عامل ألحان كل الأغاني و موزعهم

شكر خاص لخالد اللي ساعدني في تعليق لوح السبونسر علي المسرح .....

و بما أنهم أختتموا الحفله بأغنيه (حبه حبه) و دي أنا اللي كاتبها ... فأكيد هدفسها في اختم بيها الكلام

و حبه ... حبه
كترنا حبه
و كل مدي ... نزيد محبه
أملنا جنه
لعيونا غني
الكل واحد نفسه في محبه

و غني يابني و علي صوتك
أياك كلامك يكون سكوتك
و واحده واحده
و بالهداوه
هنبقي قوه تكسر تابوتك

بحلم بدنيا تساع قلوبنا
تكون حقيقه ... و صحبجيه
تدور معانا ... تدور دروبنا
تكون رحيمه بدون أسيه

و غني يابني و علي صوتك
أياك كلامك يكون سكوتك
و واحده واحده
و بالهداوه
هنبقي قوه تكسر تابوتك
و نبقي قصه حلوه و نقاوه
دي أعلي شجره في الأصل حبه

Labels:

Tuesday, September 19, 2006

ليكي تاني

انا مش قولتلك قبل كده اني بفتكرك في الأيام الزفت لما معرفش أتنفس و أخرج برا نطاق الخلق المحيطين ..... متفهمينيش غلط!!!! أنت كنتي بتيجي في الأيام السوده تزوديها ضلمه ....كنتي بطلعي عيني أكتر ماهي بظه .....و أنا كان نفسي أقولك الكلام ده بس للأسف مجتش الفرصه

كان نفسي كلمه واحده بس تقوليها و أبخ كل اللي محوشه في حصاله ذكرياتي معاكي .... أتذكر بيت شعر لشاعر مغمور كان بيقول :

ترحلين
و تخرج الكلمات غير مسموعه
تذهبين
و تخرج الكلمات الممنوعه
ليكون مصيرها النسيان

ركزي قوي بقي في الكلمات الممنوعه دي .... و أتركي لخيالك العنان


الفكره مش في ده بقي ..... الفكره اني مش في الموود و أنتي رجعتيني بقوه .... يعني رجعتيني لأيام مكنتش أحب حتي أني أفتكرها .... ما علينا يعني ..... بس شوفيلك حل .... أصل ده برضه مش أسلوب .... أنا كده هتجنن رسمي ..... تأثيرك مش بيبقي ملحوظ قوي كده و أنا مكتأب
أنا عارف برضه أن عمرك ما هتقري الكلمتين دول من أساسه بس أنا لو مأولتش البقين دول و خرجتك من نافوخي سيكا .... مش هعرف أتعامل مع خلق الله ....

بي اس : لما تحبي تشوفيني أبقي خبي وشك بأي حاجه أنشالله فوطه عشان فعلا مش عايز أشوف وش *** تاني

Sunday, September 17, 2006

الصحبجيه


حفله الصحباجيه الخميس اللي جاي ان شاء الله ..... في مسرح الجنينه في حديقه الأزهر ..... هما طبعا مش محتاجين أعلانات و لا حد يقول عنهم حاجه .... بس الصراحه دي أول مره يغنوا حاجات أنا اللي كاتبها ..... ربنا يستر بس و ميطلعش كلامي أقل من غيري في المستوي مثلا ..... علي العموم .... أنا مش قلقان مدام اللي عامل الألحان محمد أسماعيل..... و للعلم محمد أسماعيل هوا الليد جيتار و لاعب العود في الفرقه دا غير أنه الملحن ..... الواد يعني سبع صنايع و للعلم برضه هوا و محمد البدوي أعضاء في باند
cliches
ربنا يستر بقي .....

Thursday, September 14, 2006

دون كيشوت كامله

أنا كنت عملت بوست لأجزاء من القصيده دي قبل كده علي نفس المدونه دي ( كلمه من الشمخ الجواني)يعني مش حاجه جديده.... بجد معرفش أيه اللي فكرني بيها ..... بس انا بحب القصيده دي قوي .... القصيده بتحكي عن الفارس الهولندي دون كيشوت اللي حارب طواحين الهواء بأعتبارها وحوش

دون كيشوت

عايش في الدنيا بحارب
و أسمي الدون كيشوت
طواحين دايرين حوليا
وحوش في الناس بيشوط
فارس شايل سيفي في أيدي
و لابس بدلة حديد
ههزم كل وحوش الأرض
و لازم قبل ما أموت

كانت سمعتي تاج راسي
فارس ضهر الخيل
خليتني أهاجم ناسي
و ورت عمري الويل

قالوا عليا الناس مجنون
مساكين . . . مهم مشافوش
طواحين كل القرية بحالها
بيتحولوا لوحوش
طواحين أهالينا
بخيرها
كل الناس عايشين
و بيطحنوا قمحنا فيها
و عشتوا يا فلاحين
لما طاحونة فلاح تبقي
وحش بيجري وراة
تبقي دي كارثة في كل العالم
و أشهدوا يا ولداة
و مهما حاربت
و مهما بحارب
عمري لابد يفوت
لكن لازم تصحي القرية
قبل الناس ما تموت

القاهرة
28/4/2006

Labels:

النحس مش عيب

ممكن الواحد يكون فقير دقه ... مش لاقي ياكل ولا لاقي يلبس مثلا .... مش عيب ..... دي حاجه بتاعت ربنا و أكيد في حكمه لكده .... و بأتباع نفس المنطق المطروح .... أستنتجت أن النحس برضه مش عيب .... يعني ايه المشكله لما تكون نحس علي نفسك و الناس اللي حواليك ؟؟؟؟
ايه اللي هيحصل لو كانت الناس بتتشائم من دخلتك عليهم؟؟؟؟طظ يعني
يحصل ايه لو الدنيا بتتنيل ساعه لما تبقي موجود؟؟؟؟ ملكش فيه دي صدف
عادي يعني .... مع أن موضوع النحس ده أنا مبعترفش بيه بس حتي لو كان حقيقي .... أيه برضه المشكله؟؟؟



طب تعال نحكم علي الشخص النحس من خلال موقف ....و هنحط نفسنا مكانه عشان نحس الموضوع
مثلا .....لما تدخل علي زمايلك المكتب و أزاز الأوضه كله -بدون سبب- ينزل علي الأرض 100 حته و تلاقي كل اللي جوا الأوضه بيبوصلك بنظره مش ظريفه و رافعلك حاجب المليجي بمنتهي الشر.... ليه بقي الفيلم ده.... أكيد مش
انت اللي دشيته ...... و انت مالك يعني ..... دي مش مشكلتك خالص ... دي حاجه حصلت مش بأيديك يعني حتي لو كنت فعلا أنت فقري و نحس دي حاجه مش بأرادتك ... و بالتالي تبقي مش عيب ....و لو حد غلطان في الليله دي يبقي زمايلك اللي قاعدين في الأوضه و عارفين أنك هتدخل عليهم و هم عارفين أنك فقر و محدش فيهم فكر يجري بحياته.........مش كده برضه...... ولا أنا كلامي فيه غلط يا معلم؟؟؟؟

Monday, September 11, 2006

أنا جييييييييييييييييييت

أخيرا رجعت بعد طول غياب دام فتره عشره أيام .... رجعت لبلدنا ....للزهق و غمامان النفس
لمدونتي (كلمه من الشمخ الجواني) .... رجعت لمعشر الشابيبه اللي بيتكلموا ... رجعت للقهوه .... رجعت للشغل .... رجعت للكليه .... المهم يعني .... رجعت وخلاص

بيني و بينكوا الدنيا أتغيرت قوي من ساعت ما سافرت.... الواحد غاب سيكا عن البلد لقاها متشقلبه .... حركه كلنا ليلي قلبت عالم المدونات و خربت الدنيا علي دماغ حنفي و مرسي و ما شابه ... و فتحت عينين بهيه و سنيه و عيوشه علي ظلم الرجاله الديكتاتوريه

هبقي أحكيلكوا عن أجتماع طاريء حدث في سلامترو كافيه بين حركه كلنا ليلي و بعض الرجاله المكسورين المقهورين من ظلم ليلي ... مهو أكيد يعني أن ليلي مش طول عمرها الأنسانه المظلومه مهيضه الجناح , كسيره القلب , مفشوكه الفناكيح , شلولاح ....

سيبك بفي من الموضوع ده .... أنهارده أكتشافت أني أتعملي تاج لرابع مره علي التوازي من المزمازيل الأخت الصديقه المدونه لاميا ...و نزولا علي رغبه معت و نيفتيس الصديقتين الحلوين.....و طبعا المعلمه الكبيره صديقتنا الصدوقه بطابييط.......المهم يعني انه عالصبح كده لابيا ولا عليا لقيت التاج ... طيبو الله أصطابحه مانجا ... صبح تاتا ... أتنين في تلاته


هل انت عقلانى اكثر ام عاطفى؟
ساعات و ساعات .... يعني مره أزعل مره أديلوا عيني ..... الا في ساعه العصبيه بتحرر من قيود العقل البشري

صف شخصيتك فى خمس كلمات؟
مبحبش حوار وصف النفس ده .... بحس انه مش جايب همه و بعدين أحسن حاجه تسيب الناس توصفك .. بس يعني تقدر تقول عصبي , أسمراني , غاوي نضارات , سنجلاوي , بس كفايه كده


اذا كان لكل انسان شبيه من الحيوانات,أى أحيوان يشبهك؟
هوا مش حيوان الصراحه ... بس أنا كان نفسي أكون نورس .... كل شغلانته يطير و يبقي حر


ما هو لونك المفضل؟
الازرق طبعا


هل أنت أجتماعى اكثر ام منعزل؟
أجتماعي ذي النمله ... مبعرفش أعيش لوحدي ....

ماذا يشكل أصدقائك بالنسبه لك؟
كل حاجه .... الحياه هتبقي نيله قوي منغير جعفر و هشام و تهامي و علاء و سارس و بدوي و ميشو و رشدي


هل أنت مرتبط بعائلتك؟
أرتباط النمله بالصاروخ


هل أنت عصبى أكثر أم هادئ؟
عصبي موووووووووووووووووت .. واول ما اتعصب ما تقدرش تفهم كلمة من اللي بقوله .. والادهى اني ممكن ارزع اللي قدامي باي حاجة


هل تفضل فصل الشتاء أم الصيف؟
جو الشتا و حياه الصيف


متى أخر مره بكيت فيها؟ولماذا؟
مش فاكر بس دا من كتيير


احب امررها على
بطابيط السكر
daisy
elsede3`
wala
كلبوزه لكن سمباتيك