Monday, February 26, 2007

عبداللاه

لطالما أعتبرت أن هؤلاء الشحاذين و المتسولين و كل من يسرح في الشوارع طالبا (حسنه قليله تمنع بلاوي كتيره).... هو ممثل قدير جدا يصلح حتما لمنافسه كبار ممثلي السينما بل و نيل جائزه الدوله التقديريه بلا جدال
و لكن (عبداللاه) لم يكن مثل اي متسول أو شحاذ رأيته من قبل لقد كان فريدا من نوعه حيث انه الوحيد -تقريبا- الذي لم يدع الإعاقه و لم يمارس الغتاته علي أصحاب السيارات الفارهه ولا حتي علي العشاق الذين يجدون في جلستهم علي الكورنيش فسحه ممتعه و لا تكلف غير أجره التاكس و جوز جنيهات لو المزه شبطت في ترمس ..... لقد كان من نوع أصبح فريدا من الشحاذين الذين نفتقد تواجدهم ... الشحاذين الذين لا يتكلمون و لا يعبرون عن حاجتهم الماسه لأي مساعده فتحسبهم أغني منك و مني

عبد اللاه ذلك الشاب الهزيل ذو الوجه المألوف الأسمر النحيل الذي يذكرك بوجه أي مصري عاش في الصعيد .... ذو الجسد الممصوص و ان كان يشعرك أحيانا بصحه بالغه ... تعتليه جمجمه مكسوه بالجلد .... و تنقصه الساق اليسري ... فقد عرفت -لاحقا- أن ماكينه الغزل في مصنع المحله حيث كان يقطن أكلت ساقه و من يومها (عرج) الي القاهره للبحث عن فرصه عمل مناسبه أو غير مناسبه حتي .. ولكن من ذا الذي يمكن ان يعطي فرصه عمل لهذا الشاب الأعرج الذي رأيت في عينيه معاني كثيره للكفاح و النضال و أسمي معاني العزيمه و تحدي الأعاقه

عبداللاه حاول العمل لفتره في السياسه .... سياسه السيارات و لكن سرعان ما طالته أيدي الحكومه و سعادتك يا باشمهندز عارف ولاد الكلب الظباط بيعملوا ايه في الغلابه اللي زيي دول لامأخذه يا باشا بيخزوئوهم ... و عندما خرج أكتشف أنه أصبح شريدا و بلا مأوي و متخزوأ و بعد فتره أكتشف أنه أصبح شحاذا

________________

هو لم يطلب شيء من أحد .... لكنه يجلس في كوخه الخشبي المهكع ولا يرفض مساعدات الناس
________________

عبد اللاه غير نظرتي كثيرا بالنسبه للمتسولين و الشحاذين و بدأت أصدق أن من بينهم فعلا من يستحق و يحتاج المساعده ..... أخرجت ما في جيبي و أعطيته (اللي فيه النصيب) عن طيب خاطر لأول مره في حياتي و أنصرفت تاركه ورائي يطلق لي بعض الدعوات التي أسعدتني كثيرا .. و أرتسمت أبتسامه علي وجهي

________________

باصي الكوره قدام يا وله

صرخ صديقي بهذه الكلمات و هو يعدو ناحيه مرمي الفريق المنافس و بالتالي (باصيت) الكره ناحيته و توقفت عن العدو تاركا فرصه لصدري المسكين المعبأ بالدخان أن يستريح مكتفيا بمراقبه الموقف أمام المرمي من بعيد

أختلست النظر الي الملعب المجاور فأستوقفني وجه مالوف أسمر نحيل يذكرك بوجه أي مصري عاش في الصعيد .... ذو جسد ممصوص و ان كان يشعرك أحيانا بصحه بالغه ... تعتليه جمجمه مكسوه بالجلد و قد أنطلق يسجل هدفا أسطوريا بساقه اليسري التي أكلتها ماكينه العزل بالمحله يوما ما

Labels:

Sunday, February 11, 2007

مغلق حاليا

ألا ليتنى أجدُ ألفاظاً لم يَعْرِفْها الناس ، و عباراتٍ وأقوالاً بلغةٍ جديدةٍ لم يُنْقَضْ عهدُها ، فليس فيما تلوكه الألسن أقوالٌ لم تصبحْ تافهةً مملة ، ولم يقلها آباؤنا من قبل !
( نص مصرى قديم للكاتب " خعخبر رع سنت " يرجع عهده الى سنة 2150 ق.م. )


البلوج مغلق لعدم وجود كلام


نلتقي بعد شهر إن عشنا و كان لينا بقيه عمر

Tuesday, February 06, 2007

من دفتر هاملت

من دفتر هاملت
---------------

كلامي مش جنون

مش هلاوس مالخيال
مش ضحك عالدقون
مش سابقه مالخيال
مش طفره مالمحال
الدنيا علمتني
أسأل سؤال
و أتكتك و أخطط لميت أحتمال
أكون أو لا أكون
و هوا ده السؤال

صراع الأفكار في راسي
توه مني الحقيقه
من زمان عمال بآسي
و الحقيقه مش بريئه
عمي هوا أبويا
و أبويا هو عمي
و أنا هو أخويا
و الملكه هي أمي
و أبويا مش مرحوم
و أنا مش موهوم
أبويا لسا عايش
لسا شايفه من قريب
و قالي كلمه واحده
قالي عمك ده غريب
خلي بالك بس منه
و أحذر من أمك كمان
خلي عقلي شت مني
و صابني طبعا بالجنان

جنان الدنيا كله
جوا عيلتي و في ظروفي
و بيقتل كل حاجه
جوا مني الا خوفي

خلي عفلي يدور يفكر
و شك في أمي من ساعتها
في كل كلمه
و كل نظره
حتي شكي طال طيبيتها
و أتراكمت الأفكار
وأستحال الأختيار
و شبح الأنتحار
ملازم الجنون
و فارق الخيال
مفيش أحتمال
أكون أو لا أكون
يرجع تاني السؤال

القاهره
27/1/2007

Labels:

Sunday, February 04, 2007

تاج للمره السابعه

ما أنا أصلي فاضيلكوا قوي عشان كل ما يتعمل تاج يتبعتلي .... بس بيني و بينكوا التاج ساعات بيبقي مسلي آخر حاجه... في الأوقات اللي مفيش فيها حاجه تتعمل التاج بيبقي فكره هايله

ما علينا .... هوا أنا ليه بعمل مقدمه قبل ما أتكلم..صباحه يا عم الحاج


اية اللي حيحصل لايميلك لما تموت ؟
هيموت معايا ... عشان أنا الوحيد اللي معاه الباس وورد

اديت الباس وورد لحد قبل كده؟
لأ يا ناصح يا صايع أنت

لو اه كانت طبيعةعلاقتك بيه اية؟
اللهم طولك يا روح

اسمك؟
محمد... محمد رؤوف
اسم الدلع المشهور في وسط اصحابك؟
مع أن ده سؤال مستفز آخر حاجه .... بس هقولك برضه يا ريس ... غالبا بيقولوا مودي أو رؤوف
عمرك؟
ماشي في ال21 سنة
برجك؟
عقرب .... مع أني مش بعترف بالكلام ده
مجالك او مجال دراستك ؟
هندسه

شخصيتك نوعها اية؟
معرفش .... بس اللي مترب شويه في الحوار ده يبقي يسأل أي حد يعرفني لأني أخر واحد ممكن يوصف شخص

السفر بالنسبة لك؟
علي حسب السفر فين و مع مين ..... يعني ساعات بيبقي للفرهضه و ساعات للأستجمام و ساعات لتأديه الواجب جبر خواطر يعني

المود بتاعك؟
دلوقتي أنا عايز أنام تنييييييييين .... بس المود عامه ظريف... طالبه معايا روقان

وقت فراغك بتعمل فيه اية؟
معنديش وقت فراغ خالص للأسف .... لأن كل وقتي بيروح في قعدتي علي القهوه

الاكلة المفضلة؟
جمبري

الصفات اللي خدتها من بابا؟
للأسف مش كتير ... و بعد تفكير أكتشفت أني مأخدتش منه أي حاجه (اللي يعرفوا أبويا هارشين الليله) واخد بالك أنت طبعا يا سدغ

الصفات اللي خدتها من ماما؟
كل حاجه .... كل حاجه في شخصيتي بلاقيها في أمي... و قلب الأم سعادتك

اكتر 6 حاجات بتكرهها؟
الخيانه
الصداع
علي الحجار
الناس لما تمثل و تحور و تلبس شخصيات مش بتاعتها ... أقتناعا و تطبيقا خاطيء بمبدأ يوسف وهبي و ما الدنيا الا مسرح كبير
الناس الحشريه

اكتر 6 حاجات بتحبها؟
اصحابي
اغاني فيروز ومنير
النيل
الملوخيه ... بأعتبار أني قلت الجمبري قبل كده
و حبه ذكريات

الشغل بالنسبة لك؟
وسيله لأثبات الذات .... حتي أشعار أخر

اية الكومبيوتر والانترنت بالنسبة لك؟
الأنترنت غالبا للتسليه ... أما الكمبيوتر هوا أحسن و أعظم أختراع في البشريه بعد التكييف

عايزيني امرر التاج دلوقتي لحد ... طب صباح الفل
صباحه يا سدغ
معت و نفتيس
ولاء
الكرف
أبيتاف

و أي حد بقي عشان أنا بنام تنييين ... مش فايق أفكر والله