قبل الكلام

قبل الكلام
يحلا السلام
علي كل حته في أرضنا
أرضي المثال
أرض الرجال
أرض الأصول و الجدعنه

أرضي بقالها سنين كتير
و مفيش لزوم للحسبنه
طلعوا سنه أو ميت سنه
دايما طباعها السلطنه
شوف البيوت شوف الشوارع
ألمح طباعنا و الوشوش
تلقي السعاده
فيه زياده
و الضحك ااايه .... متعدهوش
شوارعنا فله
و أي مله
تظهر ناخدها في حضننا
و الدنيا هيصه
و كمان رخيصه
و كل حاجه ممكنه
حتي الهوا
من عزنا ... جميل و أنضف مننا
و مفيش ديون
و الكرواسون
دايما بييجي في أكلنا
و أقولك ايه
و أعيدلك ايه
أدي حكايه أرضنا
و أحلي سلام
لجل الكلام
اللي منيم جننا
جرب تفوق
يمكن تسوق
ناس هتحقق حلمنا
أو يلا نام
خلي الآلام
تكتر و وياها الكلام

أنا
القاهره
24/10/2006

كلام في دماغي

يا طبيب الجرح معزبني
و الحزن مطلع أيماني
و السكه خطاها متوهني
مش عارف ناقص ايه تاني
أوصفلي الوصفه المضمونه والنبي يا طبيب

أنا
_________________

يا نابشا قبرى حنانك ، ها هنا قلبٌ ينام ،

لا فرق من عامٍ ينامُ وألف عام ،

هذى العظام حصاد أيامى فرفقاً بالعظام .

أنا لست أُحسب بين فرسان الزمان

إن عد فرسان الزمان

لكن قلبى كان دوماً قلب فارس
أكره المنافق والجبان
نجيب سرور
_______________

هما الفيللا والعربيه

والنساوين المتنقيه

حيوانات استهلاكيه

شغلتهم حشو المصارين

حزر فزر شغل مخك

شوف مين فينا بياكل مين

أحمد فؤاد نجم
______________

أنا لا أرسم هذا العالم بل أحياه

أنا لا أنظم إلا حين أكاد أشل

نجيب سرور
_____________

قلبي حبك أنت قبل وداع الغروب
عشانك يا حبيبتي بيفضل الهروب

آخره طريقي حطان عاليه و طويله عليا
و أخاف عليكي يا سمره يكون عذابك فيا

أنا
___________

أنا بعت الدموع و العمر
طرحت جنايني في الربيع الصبر
و قلت انا عاشق
سقوني كتير المر

مجدي نجيب
___________

و غني يابني و علي صوتك
أياك كلامك يكون سكوتك

أنا

__________

بيقولوا ليه في بلدنا حال ماليأس بيه

الليل دا طال ... دمعي مداريه

حمول همومها القلب شال

و عشان عيونها الدمع سال

فبل القمر ما يمر ... و الليل سكون

و لمين يكون الشعر لو مش ليها يكون

و لمين يهون العمر لو مش ليها يهون

محمد حامد

__________

ليه؟؟؟؟؟؟؟

في جلسه زهق و نوم علي القهوه جلست أنا و الشباب المبسوطين الفاضيين ( أصحابي) بتكلم في اللا موضوع و بنتناقش في الأي كلام .... يقوم هشام ( واحد صاحبي ... وأكيد يعني كان قاعد معانا) يفتح موضوع جديد و دي حاجه غريبه علي القهوه عشان اللي بنبات فيه بنصبح فيه كعاده قعده القهاوي من أيام ما كانوا بيلعبوا طاوله بالحجاره ..... المهم يعني يا معلم أن الموضوع ده كان (ليه) .... لأ يا ريس مش بسألك متتربش كده ...دا هوا ده صميم الموضوع .... أسأل (ليه) علي كل حاجه و جاوب نفسك ( دا القعده وأنت فاضي طلعت وحشه أوي)و حاول تلاقي رد مقنع ليك علي الأقل

مثلا يعني ... أيه لازمه صباعك الصغير اللي في رجلك؟؟؟؟؟؟؟؟؟؟؟ ..... فكر بقي و خد مساحتك علي الآخر و هات ناس تفكر معاك و أتشقلبوا و أعملوا قرود و في الآخر هتوصلوا لنفس النتيجه اللي وصلنالها .... و هي أن صباعك ده مسئول عن زياده مقاس الجزمه بمقاس واحد ... و لو الضفر طويل حبيتين هيبقي ليه وظيفه تانيه ... و هي أنه يقطع شراباتك الجديده في أول مره تلبسها و أنت بطلعها من الكيس ( مش قولتلكوا ان القعده وأنت فاضي وحشه )....

موضوع أخر ... وهو ليه بنقول للتاكس أحنا رايحين فين قبل ما نركب مع أن دي شغلانه التاكس من أيام حفر البحر.... يعني يوصلك مكان ما أنت عايز و ميفتحش بقه بكلمه

ليه السما زرقا.... ليه مكانتش خضرا مثلا ... ولا حتي بمبي مألمه... عادي يعني

ليه زراير الكي بورد في أي حته في العالم ليها نفس الترتيب العشوائي بالملي ... خد بالك أنا الترتيب ده عشوائي

ليه السواق في العربيات بيقعد علي اليمين في حين أنه بيقعد علي الشمال في أنجلترا

ليه بقي أنا بتكلم أصلا ... منا كنت ساكت يا جدعان ... حد يسكتني ولا يمشيني من هنا بقي ولا يشفلي شغلانه نسترزق منها

ما علينا طبعا من الموضوع ده .... بس بقي نفسي في طلب ذي اللي بيطلب منك في آخر الأيميلات الأسلاميه الدينيه و يقولك قول ورايا ( و الله العظيم تلاته لأبعت الميل ده) دا عشان طبعا متعرفش تمسح الميل ولا شاف ولا من دري.... لأ ... أنا مش هطلب تبعت البوست ... بس بسأل بقي بجد كل واحد (ليه).... و دا علي فكره و لمجرد العلم بالشيء ( أختبار نفسي).... بس خلاص

رجعت و خلاص

رجعت لمدونتي ( كلمه من الشمخ الجواني) تاني..... بعد صولات و جولات مع نفسي .... بعد حروب و نزاعات مع أفكار كتيييييييييييير أكلت دماغي ... بعد ما كنت بفكر فعليا في أني أجيب ضرافها و أنزل الباب الحديد و أسنكرها بالقفل و أشغل (بودعك) بدل من (طير في السما) اللي بتصدع اللي بيفكر يقرب من هنا.... المهم يعني و من الآخر رجعت تاني و خلاص

لزمني وقت -مش كبير قوي يعني- عشان أجمع أفكاري المتنتوره في كل حته في العالم اللي أنا عايش فيه ... في الكليه ... و القهوه .... و المنطقه و شبابها .... و الكشك و وقفه الكشك بليل ... و طبعا أصحابي نفسهم و بلاوي أصااااااااااحبي نفسهم ....و لزمني و قت برضه عشان أعيد ترتيب الأفكار دي برواقه كده في السلانسيه.... و المهم يعني و من الآخر رجعت تاني و خلاص

الصراحه بقالي كام يوم نفسي أسافر و أروح عند اي بحر .... مع أحترامي الكامل للنيل طبعا و قعده النيل بس أنا دلوقتي بقي نفسي في بحر .... حد يقولي ليه؟؟ .. قولتلي ليه ...اللي يعرفوني كويس هيستغربوا من البق ده عشان أنا للأسف مبحبش البحر .... مبلاقيش فيه حاجه هوا صحيح ظريف و حلو و كبير كده ...بس النيل بقي قصه تانيه - نبقي نحكي عليه بعدين - و أنا دلوقتي نفسي في بحر

يا بحر أزرق موجه حنين
و موجه حناني
يا بحر أزرق لون عيون الأولاني

قلب يا بحر الذكريات
و روح و هات
أجمل أماني
و أرجع بقلبي للسكات
أيام صبايا الأولاني

حد قرأ الكوبليه اللي فات ده؟؟؟ .... طب ظريف ... هوا ده بالظبط اللي أنا كنت عايز أعمله بس مينفعش السكات في الزمن ده ... و متهيألي أن كاتب هذه السطور لو قام بتنفيذها حرفيا فهو أكيد في عداد الموتي بالنقطه أو من نزلاء مستشفي العباسيه بعنبر الخطيرين

الفكره اني كان نفسي أرجع شويه (لأيام صبايا الأولاني) بس أولا مينفعش ثانيا كل وقت و له أدان ... يعني دلوقتي مش وحش لو بصيتله من ناحيه تانيه.... من عند البحر مثلا ... حيث الهدوء و السلانسيه

أيام صبا و العيون كانت لسان
أيام صبا و القلب كان لساه جبان
و الخجل ورقه شجر علي غصن بان
قلب يا بحر
الذكريات

أرجع بقي لنفس الشوارع و المكان
أرجع بقي دي قلوبنا دابت مالحنان
عجله زمن بدلنا دار بينا الزمان
أنسي يا بحر
الذكريات
و خد معاك أجمل أماني
و أرجع بقلبي للسكات
أيام صبايا الأولاني

شفت بقي البحر مهم قد أيه ......... والله طلع بيشيل بلاوي و أنا كنت فكره شويه ميه زرقا كتيره شويه .... دي فعلا أول مره أبقي نفسي أروح لبحر.... أقصد يعني البحر نفسه .... مش أطلع مارينا يعني ولا الغردقه ولا شرم مثلا .... لأ ... أنا عايز بحر

ما علينا من البحر بقي و ( أيام صبايا الأولاني) و الكلام الكتير ده .... أنا فعلا وحشتني المدونه و الكتابه فيها .... متهيألي لو كنت أتأخرت سيكا عن الكتابه في المدونه أو غيرها كان زماني حصلت أخينا اللي كاتب القصيده دي -مع الأعتذار طبعا للشاعر الأخ و الصديق محمد حامد اللي كتب السطور اللي فاتت دي ... و للعلم دي أغنيه ( بحر أزرق) لفرقه الصحبجيه ألحان محمد أسماعيل ... و جميع الحقوق محفوظه طبعا عشان منقلبش بعضينا يا رجالتنا ... و المهم بقي و من الآخر أنا رجعت تاني و خلاص

اجازه عارضه ...... لدواعي الفرهضه

فرهضت ..... اخر حاجه بجد ..... وصلت لأخر مرحله في الفرهضه من كتر الكلام .... حاسس ان الشمخ الجواني بدأ يفيص و محتاج لفتره لأعاده الشحن ..... اصل يعني من ساعه ما عملت المدونه من ست شهور و أنا عمال أتكلم .... كفايه بقي .... حبه هدوء ... الرحمه حلوه

يمكن نلتقي بعد الفاصل