أن جالك الطوفان

كنت عايز أسمي العنوان (أن جالك الطوفان) حاجه تانيه ذي ( إن شفت التعديلات الدستوريه و نفضتلها) أو ( خدلك موقف من التعديلات الدستوريه و متحلقلهاش ) مثلا يعني
بس أستقريت علي العنوان ده عشان دي مش عناوين ... دي مقالات يا ريس
أنا بقيت بتكلم كتير قوي منغير لازمه اليومين دول
خلينا في المهم


أن جالك الطوفان
أو حتي شفت علامه
ليه بتطير هربان
علي جناح اليمامه
متعيش بقي وسط الناس
دي الناس أهي كترت ياما
و ظروفهم ليها مقاس
و طباع قاسيه و هدامه
و مهما بيحصل فيهم
ما بيقولوا حتي ملامه
و الناس كده كده دايرين
عايشين جوه الدوامه
و في عز الليل ماشيين
يا ندامه عليهم ياما
و القوت اليوم باليوم
تقولش دا عش حمامه
عايزين الظلم يقوم
أو حتي تقوم القيامه
إن جالك الطوفان
أو حتي شفت علامه
يا مصري يا حيران
قول علينا السلامه

القاهره

26/3/2007

لا يهمني من يحكم وطني مادمت أنا أكتب أغانيه ....

طاغور

شاعر هندي

غرس الوهم في الحدائق

من الواضح أن (دون كيشوت ) هيبقي ليه صولات و جولات مع العبد لله .... كنت كتبت قصيدتين قبل كده عن تلك الشخصيه و دي تالت قصيده
و بعمل أتنين تانيين كمان ( و بعد كده هتحول لدون كيشوت) المهم يعني أني بفكر في الأخر أجمعهم و ربنا يسهل بقي أبقي أنشرهم ولا أولع فيهم حتي


غرس الوهم في الحدائق


غرست ورده وسط جناين الهوا
و زرعت قلبي فيها
و بكل ذكري حلوه لينا سوا
زينت الورده بيها
و لقيتها منوره وسط الجناين
ذي البنور
واللولي
و عيونك أنت يا منايا
وسط النور
بيندهولي
و يغمزولي
و يضحكولي
و بكلمه واحده بيقولولي …. بحبك

___ . ___ . ___ . ___

يا أيها العشاق….
لا تدعوا الهوي…..
من قبل أن تجربوا الفراق!!!! *1

___ . ___ . ___ . ___

لا …. أنا لم أدع الهوي
و السهر
و كل كلام العشق علي ضي القمر
كنت قولته….
أو بقوله…..
أو لسا هقوله ….
مش إدعاء
و لا ضحك عالدقون
دا كله أشتياق
من قلبي الحنون
و عقلي المجنون
مصارع الأفكار

___ . ___ . ___ . ___

يا دون كيشوت أصحي من جنانك
أصحي من أوهامك
يا مدعي الحب و الهوي
أنت لا تعشق امرأه…..
أنت تعشق الحب في صوره امرأه
تعشق غزل العينين
تعشق اللهفه و الحنين
*2 فعشقت دولسين !!!!
عشقت وهما و تغنيت له
و كتبت له شعرا ….
و نثرا….
و غرقت في بحر الوهم حبا
فكيف تقول أنك لا تدعي الحب
أنت أكبر المدعين
و المخبولين …. أيضا
كفاك حمقا
كفاك حلما
كفاك زرعا للوهم في الحدائق

القاهره
11/3/2007

1* من (لزوم ما يلزم) لنجيب سرور

2* حبيبه دون كيشوت الوهميه

جايلك يا ساقيه

قلقان !!! .... يمكن
فرحان!!!! .... شويه
خايف؟؟؟؟ .... لأ ... مرعوب

و مفيش سبب وجيه يخليني أخاف أصلا ... بس متهيقلي أن السبب هو الأحساس بالمسئوليه يمكن يكون هو السبب الأهم في ذلك الأحساس

المهم يعني أن الصحبجيه رايحين الساقيه يوم الثلاثاء 13 مارس و أنا رايح علي حسهم ... و معايا طبعاصديقي القديم اللي ملازمني في كل حاجه ( الشاعر محمد حامد ) كما أنضم الينا في طابور الشعراء (محمد ابو الصالحين) زميل الدراسه

الحفله تضم 17 أغنيه من ألحان محمد أسماعيل و من أشعار محمد حامد و محمد أبو الصالحين و العبد لله ذي ما قلت قبل كده ... أدعولنا بقي نكون عند حسن ظنكم عشان الموضوع ده مسببلي أزمه عظيمه

حاولت سابقا أن أتكلم عن الصحبجيه في الحفله السابقه بحديقه الأزهر و لمزيد من التفاصيل عن الحفله الجديده أقرأ ما كتبه محمد حامد هناhttp://m-rashed.blogspot.com/2007/03/blog-post_11.html

التجربه دي مش جديده عليا و دي مش اول فرقه أشتغل معاها ... بس بجد انا بفرح قوي لما بسمعهم
أبقوا تعالوا و شرفونا