آل غلبان يا خاين آل

هل ممكن يكون الخاين غلبان فعلا؟؟؟؟؟ ..... أعتقد أنه صعب ... صعب قوي كمان

سمعت أغنيه من سنه مثلا للشاعر صديقي هشام سراج الدين مطلعها بيقول غلبان يا خاين و طبعا المطلع شدني آخر حاجه عشان أعرف غلبان ايه ده اللي خاين ... الجمله نفسها جديده و الفكره لسا محدش أستهلكها كتير و أنا أعشق الجديد المبهر و الآخاذ فأحببت الأغنيه من قبل حتي أن يتم تلحينها
و فعلا أقتنعت أن الخاين ممكن يكون غلبان

الأغنيه لفرقه ليموزين
غلبان يا خاين
صحيح خاين لكن غلبان
عايش مستني يوم يتخان
أصله عارف عدل ربك
هو ربك وحده يعلم أد أيه تعب اللي أتخان
عدل ربك مش هيسيبه
فين ما راح في يوم هيجيبه
يدوقه طعم الخيانه
يندمه اليوم اللي خان
يعلمه أن الدنيا دي
مديون و داين
ملهاش عزيز و الكل هاين
ما بالك بقي باللي خان
صحيح خاين لكن غلبان

هشام سراج الدين

و بعدين معاك

يا جدعان هتجنن .... عايز أكتب و مش عارف... نفسي أكتب حاجه
حتي و لو كانت (هاو هاو) تاني .... مش ممكن حاله الأحباط و الأكتئاب الشعري اللي متعرفش تعيش و لا تعمل معاها أي حاجه
حاجه رزله ملهاش معني و لا لازمه ... ذي ماتقول كده برد الصيف (حاجه رزله) أو علي الحجار بيغني في الراديو و الأرسال وحش آخر حاجه و الدنيا صهد و فرهضه في التحرير أتنين الضهر (حاجه أرزل) ... المهم يعني أن أنا بكره الموقف ده أو المواقف دي .... بحس بأن تنين قاعد علي صدري أو أن -نفس التنين- قاعد علي حريتي بيفطسها


طب و بعدين .... طب أنا هكلم نفسي شويه يمكن أجيب مطلع أغنيه كويس
معلش يا جدعان .... أن الله مع الصابرين
خد عندك مثلا يا معلم المطلع ده .... مشيت ورا الدخان

لأ .... مش عاجبني ... و بعدين مش وقته كمان
أنا عايز حاجه في السريع

طب ايه رأيك في ده .... ليه يا قمري ليه

يعععععععع قوي .... ليه ايه و نيله ايه.... جتك ستين نيله

خلاص يا عم براحه .. طظ في المطلع ده نجيب غيره
طب ما تجيب يا صايع

حبيبتي

مش قولتلك صايع .... حبيبتي ايه يا بجم

حبيبتي بحبها

غور ياض من هنا .... أنا هعتزل

طب ايه رأيك في ده ... كمل كلامك

فعلا جديد المطلع ده و محدش قالوا قبل كده

يا غبييييييي .... يا رب صبرني

جرا ايه يا زفت أنت ... أنت مفيش حاجه عاجباك ... و بعدين معاك يا عم

أنت قلت ايه دلوقتي؟؟؟؟ .... هي دي يا جااااااااااااامد

أصبر بقي و أديني بتاع ساعه يا برنس

و بعدين معاك
بعدين معاك عااك عااك عااك
و بعدين معاك
شفتك هناك
وشك قفاك

طيب بص يا كبير الليالي
ايه رايك لو كانت كده


و بعدين معاك!!!!
حياتك كلها عشتها
ما بين سنين ملهاش لزوم
و كل يوم
مالنوم تقوم
تندم علي
كل حاجه عملتها
و كل خطوه أخدتها
و بعدين معاك!!!!!
أعقل بقي
فكر بقي ……..
الناس عليك مبرقه
صعبه الحياه و مزنقه
لكن أكيد متشوقه
تطلع شموسها مالغيوم
و هييجي يوم
تلقي حياتك بهججه
و العين عليك مبحلئه
علي دنيا ظابطه معاك تمام
علي عيشه فاضيه من الآلام
سهله و مات فيها الكلام
و ترجع تقول
أمتي تزول
أمتي يغوروا اليومين دول
حيرتني مش معقول
و بعدين معاك !!!!!!

القاهره
14/3/ 2007

PS :سوري علي الفيلم العربي الساذج اللي عملته يا مدونتي العزيزه .... بس أنا كان لازم أتجنن اليومين دول